يسرا: التاريخ دايما بيعيد نفسه والسوشيال ميديا صعبت الدنيا

2:54 م

دقيقة واحدة

كتبت- منة عبدالكريم

حلت الفنانة يسرا ضيفة على برنامج طريق ثالث، على راديو إنرجي 92.1.

وقالت يسرا: “أحيانا بنمشي في طريق تالت وبيكون القدر هو السبب، وده نعمة من ربنا إنك تمشي بطريق أحسن من الطريق اللي كنتي عايزاه”.

وبسؤالها عن شخصيات كان لها أثر كبير في حياتها، قالت: “والدتي أثرت فيا بشكل كبير جداً و تعلمت الكثير من أساتذة اشتغلت معاهم على مدار السنوات الماضية فالشغلانة دي غنية جداً وصعبة تخليك تتعلم الكتير”.

وعن الأشخاص السلبيين في حياتها، قالت: “ممكن تتصدمي خلال رحلتك في ناس وإنهم يكونوا بالشر ده بس للأسف موجودين في حياتك، وهنا لازم توقفي وقفة مع نفسك علشان تحصني نفسك إنك تتوجعي”.

وتابعت: “والدتي أثرت فيا وفي تعليمي كان ليها الفضل الأول والأخير في حياتي، وفي المدرسة كنت أحترم جميع المدرسين ولكن كنت أخاف من مديرة المدرسة و في النفس الوقت علمتني أشياء كثيرة”.

وبسؤالها عن شخصيات تاريخية أثرت فيها، قالت: “أنا بشوف أن التاريخ بيعيد نفسه في مشاكله والفجوات اللي بتظهر والنجاحات والإخفاقات زي ما هتلاقي على مر التاريخ قصص عن الخيانة والحب وكل المعاني هتلاقيها في الوقت الحالي مع اختلاف الشخصيات والمواقف”.

وأضافت: “أنا لما بختار الشخصية بيكون فيها جزء مني أو إنك مريت بتجربة مع شخص بنفس المواصفات، أحياناً كتيرة في المعالجة الدرامية بنحاول نخفف الشخصيات وبعض الحاجات بنزودها علشان تأثر في المشاهد”.

وعن تأثير السوشيال ميديا، قالت: “أنا محددة استخدامات السوشيال ميديا مش بالمشاهدات ولا بالشير ، وكمان السوشيال ميديا لا تستخدم في السبب الرئيسي لوجودها و هي الحصول على المعلومة الحقيقة، السوشيال ميديا كانت موجودة علشان تسهل الدنيا ولكنها صعبتها”.